有日一早我返到診所開門。
見到門外有位小姐喺度等緊，我正打算自己開鎖自己入去時，一起身佢貼住咗我背脊…
我立即彈開：「哇，做咩呀小姐」
佢指住隻門手指不停郁，應該係講緊要入去嘅意思，但係你頭先嗰下似想入我多啲喎。
我：「小姐你要等多陣呀，我哋未夠鐘嘅，等多十五分鐘先可以入嚟登記」
我正想推門入診所，佢又再一次貼埋嚟我背脊。
頂你個制。
我擰轉身同佢講：「小姐，我再講多一次，我哋未開門嘅，麻煩你等多十五分鐘，開門嘅時候我哋呢塊牌會轉成應診，你唔駛即刻跟住我入嚟嘅，我仲要準備好多嘢先可以開門俾你入嚟，麻煩你企喺度等吓又或者去附近行吓先都得」
佢條氣唔多順咁樣：「你見到我喺度，我又見到你嚟開門，點解我唔可以入去呀？」
我：「我未開門應診㗎，我哋九點先開門」
佢碌到對眼好：「我睇住你開門㗎喎」
我：「我係要入去準備應診嘅嘢，九點先會開門先會登記，請你等多陣」
佢：「我唔等㗎，我走㗎，我會走㗎」
好呀。走啦，走啦嘛，仲唔走？企喺度做咩呀？等撻地變淋呀？
我望住佢，佢問我：「你望住我做咩呀？」
我其實係想目送你走，不過見你唔走，我唯有將呢份心意埋藏在心底裡…
我：「冇嘢，咁你等多陣啦」
佢抬頭望望上方：「一陣可能會落雨」
我又望望佢望嘅上方，冇理佢，自己推門入診所，再立即鎖返隻門。
佢隔住門同我講：「會落雨喎，你唔俾我入嚟呀？」
我急急腳行入去準備開門嘅嘢…大家都喺室內地方，落雨關你屁事咩，做戲都要有返啲演員道德呀。
Search